ਮੁਲਕ ਰਾਜ ਆਨੰਦ (12 ਦਸੰਬਰ 1905-28 ਸਤੰਬਰ 2004) ਅੰਗਰੇਜ਼ੀ ਵਿੱਚ ਲਿਖਣ ਵਾਲੇ ਪ੍ਰਸਿੱਧ ਭਾਰਤੀ ਨਾਵਲਕਾਰਾਂ ਵਿੱਚੋਂ ਹਨ। ਉਹਨਾਂ ਦਾ ਜਨਮ ਪੇਸ਼ਾਵਰ ਵਿੱਚ ਹੋਇਆ ਸੀ। ਉਹਨਾਂ ਨੇ ਲਾਹੌਰ, ਲੰਡਨ ਅਤੇ ਕੈਮਬ੍ਰਿਜ ਦੀਆਂ ਯੂਨੀਵਰਸਿਟੀਆਂ ਵਿੱਚ ਸਿੱਖਿਆ ਪ੍ਰਾਪਤ ਕੀਤੀ ਅਤੇ ਕਈ ਸਾਲਾਂ ਤੱਕ ਇੰਗਲੈਂਡ ਵਿੱਚ ਰਹੇ, ਅੰਤ ਵਿੱਚ ਯੁੱਧ ਤੋਂ ਬਾਅਦ ਪੱਛਮੀ ਭਾਰਤ ਦੇ ਇੱਕ ਪਿੰਡ ਵਿੱਚ ਵਸ ਗਏ। ਉਨ੍ਹਾਂ ਦੀ ਮੁੱਖ ਚਿੰਤਾ ਭਾਰਤੀ ਸਮਾਜ ਦੇ ਉਸ ਵਰਗ ਲਈ ਰਹੀ ਹੈ, ਜਿਸਨੂੰ ਹਮੇਸ਼ਾ ਘਟੀਆ ਸਮਝ ਕੇ ਨਕਾਰਿਆ ਗਿਆ ਹੈ। ਜਿਨ੍ਹਾਂ ਕੋਲ ਜ਼ਾਲਮਾਂ ਦੇ ਵਿਰੁੱਧ ਆਪਣਾ ਦਰਦ ਬਿਆਨ ਕਰਨ ਦਾ ਕੋਈ ਤਰੀਕਾ ਨਹੀਂ ਸੀ।
“ਅਛੂਤ” ਉਨ੍ਹਾਂ ਦੇ ਪ੍ਰਸਿੱਧ ਨਾਵਲ “untouchable" ਦਾ ਪੰਜਾਬੀ ਅਨੁਵਾਦ ਹੈ।
 ਕੁਦਰਤ ਨੇ ਸਭ ਨੂੰ ਇਕੋ ਜਿਹਾ ਹੀ ਪੈਦਾ ਕੀਤਾ ਹੈ। ਪਰ ਕੁੱਝ ਅਖੌਤੀ ਲੋਕਾਂ ਨੇ ਆਪਣੇ-ਆਪ ਨੂੰ ਉੱਚੇ ਅਤੇ ਦੂਜਿਆਂ ਨੂੰ ਨੀਵੇ ਕਹਿ ਕੇ, ਉਹਨਾਂ ਨੂੰ ਦਬਾ ਕੇ ਰੱਖਣ ਲਈ, ਜਾਤ-ਪਾਤ ਦਾ ਢਾਂਚਾ ਬਣਾਇਆ। ਇਹ ਨਾਵਲ ਵੀ ਅਜਿਹੇ ਹੀ ਜਾਤ-ਪਾਤ ਦੇ ਚੱਕਰਵਿਊ ਵਿੱਚ ਫਸੇ, ਸਮਾਜ ਵੱਲੋਂ ਅਛੂਤ ਕਹੇ ਜਾਂਦੇ, ਪਰਿਵਾਰ ਦੀ ਕਹਾਣੀ ਹੈ।
 ਇਸ ਨਾਵਲ ਦਾ ਪੰਜਾਬੀ ਅਨੁਵਾਦ ਪ੍ਰਸਿੱਧ ਲੇਖਕ ਬਲਵੰਤ ਗਾਰਗੀ ਵੱਲੋਂ ਕੀਤਾ ਗਿਆ ਹੈ। 
ਬਲਵੰਤ ਗਾਰਗੀ ਪੰਜਾਬੀ ਭਾਸ਼ਾ ਦਾ ਨਾਮਵਾਰ ਨਾਟਕਕਾਰ, ਨਾਵਲਕਾਰ ਅਤੇ ਕਹਾਣੀਕਾਰ ਸੀ।