ਅਮਰੀਕਾ ਦੇ ਜਿਹੜੇ ਲੇਖਕਾਂ ਨੇ ਵਿਸ਼ਵ ਪੱਧਰ ਦੀ ਪ੍ਰਸਿੱਧੀ ਹਾਸਿਲ ਕੀਤੀ ਹੈ, ਉਨ੍ਹਾ ਵਿਚ ਐੱਫ. ਸਕਾਟ ਫਿਟਸਜਰਲਡ ਦਾ ਨਾਂ ਬੜਾ ਉੱਘੜਵਾਂ ਹੈ।
ਸਕਾਟ ਦਾ ਜਨਮ 24 ਸਤੰਬਰ 1896 ਨੂੰ ਅਮਰੀਕਾ ਦੀ ਮਿੰਨੀਸੋਟਾ ਸਟੇਟ ਦੇ ਇਕ ਕਸਬੇ ਸੇਂਟ ਪਾਲ ਮਿਨੀਸੋਟਾ ਵਿਚ ਇਕ ਦਰਮਿਆਨੇ ਦਰਜੇ ਦੇ ਪਰਿਵਾਰ ਵਿਚ ਹੋਇਆ। ਉਹ ਪ੍ਰਿੰਸਟਨ ਯੂਨੀਵਰਸਿਟੀ ਵਿਚ ਦਾਖਲ ਹੋਇਆ ਪਰ ਗ੍ਰੈਜੂਏਸ਼ਨ ਨਾ ਕਰ ਸਕਿਆ। ਉਸ ਦਾ ਵਧੇਰੇ ਧਿਆਨ ਸਾਹਿਤਕਾਰੀ ਵੱਲ ਸੀ। ਉਹ ਆਪਣੇ ਵੇਲੇ ਦਾ ਪ੍ਰਸਿੱਧ ਨਾਵਲਕਾਰ, ਕਹਾਣੀਕਾਰ, ਨਿਬੰਧਕਾਰ ਅਤੇ ਫ਼ਿਲਮ ਪਟ-ਕਥਾ ਲੇਖਕ ਸੀ। ਉਸ ਨੇ ਚਾਰ ਨਾਵਲ, 164 ਕਹਾਣੀਆਂ ਅਤੇ ਬਹੁਤ ਸਾਰੇ ਨਿਬੰਧਾਂ ਦੀ ਰਚਨਾ ਕੀਤੀ। ਆਪਣੀ ਉਮਰ ਦੇ ਆਖ਼ਰੀ ਵਰ੍ਹੇ ਉਸ ਨੇ ਹਾਲੀਵੁੱਡ ਵਿਚ ਗੁਜ਼ਾਰੇ। 1940 ਵਿਚ ਉਸ ਦੀ ਮੌਤ ਹੋ ਗਈ।
'ਦੀ ਗ੍ਰੇਟ ਗੈਟਸਬੀ' ਉਸ ਦਾ ਸਭ ਤੋਂ ਵੱਧ ਪੜ੍ਹਿਆ ਜਾਣ ਵਾਲਾ ਨਾਵਲ ਹੈ, ਜੋ 1925 ਵਿਚ ਛਪਿਆ । ਉਂਝ ਇਹ ਨਾਵਲ ਉਸ ਨੇ 1924 ਵਿਚ ਹੀ ਲਿਖ ਲਿਆ ਸੀ, ਪਰ ਪੂਰਾ ਸਾਲ ਉਹ ਇਸ ਨੂੰ ਸੋਧਦਾ ਰਿਹਾ। ਉਹ ਇਸ ਨੂੰ ਆਪਣੀ ਸ਼ਾਹਕਾਰ ਰਚਨਾ ਮੰਨਦਾ ਸੀ ਅਤੇ ਇਸ ਨਾਵਲ ਦੀ ਵਿਸ਼ਵ ਪੱਧਰ ਦੀ ਪ੍ਰਸਿੱਧੀ ਨੇ ਉਸ ਦੇ ਇਸ ਕਥਨ ਉੱਤੇ ਮੋਹਰ ਲਗਾ ਦਿੱਤੀ। ਜਿਉਂ ਜਿਉਂ ਲੋਕ ਇਸ ਨਾਵਲ ਨੂੰ ਪੜ੍ਹਦੇ ਗਏ, ਤਿਉਂ-ਤਿਉਂ ਇਸ ਦੀ ਮਕਬੂਲੀਅਤ ਵਧਦੀ ਗਈ। ਇਸ ਨਾਵਲ ਵਿਚ ਪ੍ਰਤੱਖ ਰੂਪ ਵਿਚ ਡੇਜ਼ੀ, ਟੋਮ ਅਤੇ ਗੈਟਸਬੀ ਦੀ ਤਿਕੋਣੀ ਪ੍ਰੇਮ ਕਥਾ ਚਲਦੀ ਹੈ। ਇਸ ਵਿਸ਼ਵ ਪ੍ਰਸਿੱਧ ਨਾਵਲ ਉੱਪਰ ਤਿੰਨ ਫ਼ਿਲਮਾਂ ਬਣ ਚੁੱਕੀਆਂ ਹਨ।